СОР17: ЦӨЛЖИЛТ НЬ ЗӨВХӨН ЦӨЛ ТЭЛЭХ ҮЗЭГДЭЛ БУС, ГАЗРЫН АМЬДРАХ ЧАДВАР ДОРОЙТУУЛДАГ
Цөлжилт нь зөвхөн цөл тэлэх үзэгдэл бус, газрын амьдрах чадвар доройтож, хөрс, ус, ургамал, бэлчээр болон амьжиргаанд нөлөөлөх өргөн хүрээтэй үйл явц юм. Газрын нөхөн сэргээлт нь мод тарихаас гадна экосистемийг бүхэлд нь сэргээх, доройтлыг бууруулах, алдагдсан газрын чанарыг нөхөн сэргээх зорилготой бол ган гачиг нь ус, хүнс, бэлчээр, орон нутгийн иргэдийн амьжиргаанд шууд нөлөөлдөг.
Газрын доройтлын тэг баланс нь шинээр үүсэх доройтлыг бууруулж, доройтсон газрыг нөхөн сэргээх замаар газрын чанарын алдагдлыг тэнцвэржүүлэх зорилт юм. Энэ хүрээнд цөлжилт, газрын доройтол, ган гачгийн асуудал нь байгаль орчны салбарын хүрээнээс хальж, хүнсний аюулгүй байдал, усны нөөц, бэлчээрийн тогтвортой байдал, орон нутгийн хөгжлийн чухал асуудал болж байна.
