АТГ: ЭМЯ-НЫ ТӨРИЙН НАРИЙН БИЧГИЙН ДАРГА Д.О НЬ ШААРДЛАГА ХАНГААГҮЙ НЭР ДЭВШИГЧДИЙГ ТЭТГЭЛЭГТ ХӨТӨЛБӨРТ СОНГОН ШАЛГАРУУЛЖЭЭ
Авлигатай тэмцэх газрын Хяналт шалгалт, дүн шинжилгээний хэлтэс нь 2026 оны 4 дүгээр сарын 13-17-ны өдрүүдэд нийтийн албанд томилогдохоор нэр дэвшсэн 330 иргэний хувийн ашиг сонирхлын урьдчилсан мэдүүлгийг шалгаж, 296 мэдүүлгийг хянан шийдвэрлэжээ.
Одоогоор ажиллагаанд 34 нэр дэвшигчийн хувийн ашиг сонирхлын урьдчилсан мэдүүлэг хянагдаж байна. Тухайн албан үүргийг гүйцэтгэхэд илт ашиг сонирхлын зөрчил үүсэхээр байгаа 7 нэр дэвшигчийн талаар томилох эрх бүхий албан тушаалтанд мэдэгдсэн байна.
Өнгөрсөн хугацаанд иргэн, аж ахуйн нэгж, байгууллагаас ирүүлсэн нийтийн албан тушаалтны авлига, ашиг сонирхлын зөрчилтэй холбоотой 134 гомдол, мэдээллийг хүлээн авч шалгаснаас 25 гомдол, мэдээллийг хянан шийдвэрлэжээ.
Хяналт шалгалтаар илрүүлсэн зөрчлүүдэд авлигын эсрэг хууль тогтоомжид заасан хариуцлага тооцуулахаар албан бичиг хүргүүллээ. Тухайлбал, Эрүүл мэндийн яамны Төрийн нарийн бичгийн дарга Д.О нь сонгон шалгаруулалт явуулах ажлын хэсгийн даргаар ажиллахдаа албан хаагчид амаар хууль бус үүрэг даалгавар өгснөөр бусдад давуу байдал бий болгож, шаардлага хангаагүй нэр дэвшигчдийг тэтгэлэгт хөтөлбөрт сонгон шалгаруулсан нь Авлигын эсрэг хуулийн 7.1 дүгээр зүйлд заасан албан үүргээ зохих ёсоор гүйцэтгэж байгаа төрийн албан хаагчид дарамт, шахалт үзүүлэх, хөндлөнгөөс оролцох, нөлөөлөх, албан үүргээ гүйцэтгэхдээ хууль бусаар аливаа хувь хүн, хуулийн этгээдэд давуу байдал олгох, олгохоор амлах, бусдын эрхийг хязгаарлах, албаны эрх мэдэл буюу албан тушаалын байдлаа урвуулах, хэтрүүлэх зэрэг заалтуудыг зөрчсөн байх тул хуулийн хэрэгжилтийг хангуулахаар Засгийн газрын Хэрэг эрхлэх газарт албан бичиг хүргүүлсэн байна.