"ЦАХИМ ШИЛЖИЛТ БА ЗАЛУУЧУУДЫН ХӨДӨЛМӨР ЭРХЛЭЛТ" НЭГДСЭН ФОРУМ ЗОХИОН БАЙГУУЛЛАА
Манай улсын хүн амд хүүхэд, залуучуудын эзлэх хувь өндөр байгаа ч залуучуудын дунд ажилгүйдэл, эдийн засгийн идэвхгүй байдал мөн өндөр. Залуучууд цалин хөлснөөс илүүтэй ажлын байрны уян хатан байдал, зайнаас ажиллах боломж, ажил-амьдралын тэнцвэрт байдал, сэтгэл зүйн хувьд эрүүл, эерэг ажлын соёл, орчин болон тасралтгүй сурч боловсорч, хөгжих боломжийг нэн тэргүүнд тавьдаг болсон.
Залуучууд ажил амьдралын гараа, карьерийн хөгжил, төлөвлөлтөд хэрхэн бэлтгэх, хөдөлмөр эрхлэлтэд тулгарч байгаа асуудал, бэрхшээлийг хэрхэн даван туулах, нөөц боломжийг хэрхэн зөв удирдаж, ашиглах талаар харилцан мэдээлэл солилцсон “Хувьсан өөрчлөгдөх хөдөлмөр-Цахим шилжилт ба залуучуудын хөдөлмөр эрхлэлт” нэгдсэн форум, өдөрлөгийг үндэсний томоохон их дээд сургуулиудтай хамтран зохион байгуулжээ.
Гэр бүл, хөдөлмөр, нийгмийн хамгааллын яам 2026 оныг Хөдөлмөр эрхлэлтийг дэмжих жил болгон зарласан. Энэ хүрээнд “Залуучуудын хөдөлмөр эрхлэлтийг дэмжих” хөтөлбөрийг шинээр хэрэгжүүлж эхэлсэн. Хөтөлбөрийн хүрээнд оюутан залуучуудад сургуулиа төгсөөд ажилд ороход тулгардаг "туршлагагүй" гэх саадыг давахад тусалж, харилцааны соёл, багаар ажиллах, асуудал шийдвэрлэх, бүтээлчээр сэтгэх зэрэг зөөлөн ур чадварыг олгох сургалтуудыг зохион байгуулах юм. Шинэ санаа, инновацыг бизнес болгоход санхүүгийн болон мэргэжлийн зөвлөх үйлчилгээгээр дэмжих зэрэг олон арга хэмжээг тусгасан юм.
Нэгдсэн форум өдөрлөгийн хүрээнд “Цахим шилжилт ба ажиллах хүчний эрэлт нийлүүлэлтийн уялдааг хангах нь”, “Цахим шилжилт ба залуучуудын хөдөлмөр эрхлэлт” сэдвийн хүрээнд хэлэлцүүлэг өрнүүлсэн. Мөн “Хиймэл оюун ба ажлын байрны сорилт”, “Хиймэл оюун ба боломж”, “Гэр бүлд ээлтэй ажлын байрны бодлогын хэрэгжилтийн өнөөгийн нөхцөл байдлын судалгаа” сэдвээр залуучуудад сонирхолтой мэдээллийг хүргэж, Ур чадвараа хэрхэн таних, ахиулах, хөдөлмөр эрхлэлтийн шинэ эринд хэрхэн үр дүнтэй ажиллах талаар зөвлөсөн “Pecha kucha /товч илтгэл/”-үүд танилцуулсан байна.
Технологи, хиймэл оюун ухаантай өрсөлдөж биш, харин технологи, хиймэл оюун ухааныг ашиглаж ажилтай, орлоготой, ажил бүр нь үнэ цэнтэй байх нь чухал болохыг форумын илтгэгчид онцолж байна. Арга хэмжээнд МУИС, ШУТИС, МУБИС, ХААИС, СУИС, АШУУИС-ын 1000 гаруй оюутан залуучууд оролцжээ.