БОУАӨ-ын сайд С.Одонтуяа Узбекистан улсад ажиллаж байна
Байгаль орчин, уур амьсгалын өөрчлөлтийн Сайд С.Одонтуяа Бүгд Найрамдах Узбекистан улсад ажлын айлчлал хийж байна. Энэ хүрээнд өнөөдөр Монгол Улсаас Бүгд Найрамдах Узбекистан Улсад суугаа Элчин сайд Д.Батбаатартай уулзаж Монгол Улс, Узбекистан Улсын байгаль орчны салбарын хамтын ажиллагааг хөгжүүлэх чиглэлээр саналаа солилцжээ.
Элчин сайд Д.Батбаатар Узбекистан Улсын хөдөө аж ахуй, агро-ой, ойжуулалт, усны нөөцийн менежментийн сайн туршлагаас суралцах зүйлс нэлээдгүй болохыг онцолжээ.
Байгаль орчин, уур амьсгалын өөрчлөлтийн сайд С.Одонтуяа Бүгд Найрамдах Узбекистан Улсын Самарканд хотноо энэ сарын 02-08-ны өдрүүдэд зохион байгуулагдах "Дэлхийн уур амьсгалын сорилтууд дундах Төв Ази: Хамтын хөгжил цэцэглэлтэд нэгдэх нь" сэдэвт олон улсын чуулга уулзалтад оролцох юм байна.